آآآه يـــاقــلـبِــــــــــــــــــــــــى ...
******
آه ياقلبِى ياللى شايل
كُل آلام الحياه
=
ليه تداوى الناس وجرحك
يألِمَك ماتقولشِ آه
=
واسألـَك وتقولـِّى سيبَك
كُل واحِد لـُه جَزاه
=
ربِّنا عالِم بحالـَك
هوَّ عارف مُنتـَهاه
=
هوَّ عالِم باللى ماشِى
واللى وسط السِكـَّه تاه
=
هوَّ قادِر ع اللى ظالِم
بَس ماهِل للجـُناه
=
كُل وقت ولـُه أدانـُه
كُل واحِد لـُه قـَضاه
=
واللى صابر ع البلاوى
يعلمُه برضو الإلَه
=
واللى مات مظلوم بحقه
ينتقم قاضى القـُضاه
=
مش مُهِم الناس تخونـَك !!
المُهِم تنول رضاه
=
إنتَ صح تمام ياقلبى
بس انا فـَرَّطت ، يــاااه !!
=
نفسى الاقى قلب زَيَّك
وانسِعِد وافرح معاه
=
******
لو مشيت هتشوف طبايع
فى البَشـَر تِصعَب عَليك
=
اللى ياخـُد وامَّا يدِّى
يدِّى شوك يجرح ايديك
=
واللى يضحَكلـَك فى وشـَّك
وامَّا تِمشِى يذم فيك
=
واللى لو مديتلـُه إيدَك
يتسِنِد ويدوس عَليك
=
واللى يوصِف حُب غالى
بعدها يجرح عينيك
=
لـَجل قلبُه لِسَّه خالِى
بس اهو بيتسَلـَّى بيك
=
وانتَ سَهران الليالى
لـَجل فاكرُه بيناديك
=
واللى رافِع نفسُه عالِى
عُمرُه يوم مايحِس بيك
=
وامَّا يطلـُب تِرضـَى عَنـُّه
يمدَحَك ويبوس إيديك
=
وامَّا يحتاجلـَك فى حاجَه
يحضـُنـَك لـَمـّا يلاقيك
=
شوف ياقلبى كُلِّ حاجَه
لـَجل يوم ماتقولشِ آآه
=
لـَو هالاقِى قلب زَيـَّك
تِبقـَى ضِحكِتلِى الحياه
***
*****
****
***
**
*
وإليكم بعض الردود التى أعجبتنى
على هذه القصيدة وتفاعلى معها
1-رد الأخ والصديق
الشاعر الساخر /عاميةforever
لما يبقى قلب زيك
كل شئ جواه حنون
لما نعرف من كلامك
إنك إنت طبيب عيون
يبقى ليه ياقلبه تحمل
كل الام الحياه
ياطبيبنا قلبى عندك
واسأل النحله ف دواه ..
( إوصفلنا الدواء يا أخ مسعد)
لونك حزين ومؤثر جدا هذه المره أستاذنا
ويخدر المشاعر إلى أن تنساب وكأنها إصتدمت بجرح أليم ..
نص عميق أحييك عليه .دام إبداعك وزالت ألامك .
***
2_ رد الأخ والصديق الشاعر الكبير
الأستاذ / مسعد النحلة
سلمت يداك التي كتبت ، وقريحتك التي أبدعت ،
ومهجتك التي أحست فأخرجت ،
وسلمت لنا شاعرا لا ينضب معينه أبدا .
أما أخي عاميه وفي كلماته الجميله المقفاه والموشاه بخفة ظله المعروفه
قد طلب مني أن أصف الدواء ويوقعني في الغلط
ويُقبض عليَّ بتهمة ممارسة المهنه بدون تأهيل أو ترخيص ،
وأستئذنك إني أقول له :
أخـــي نصـــــير العامـــــيه
شِعرك جمـــــيل ميه الميــه
لكن أرد وأقــــولك إيـــــــه
خايف أضيع من غير دِيَّـــه
ــــــــــــــــــــــ
أوصِف دوا لطبيب غالـي ؟
ويا عيني ع اللي هيجرالــي
ياخدوني على طول تخشيبه
نصاب من النوع العالــــــي
ــــــــــــــــــــ
لكن هاقول وصفه وسهلـــه
ممكن يروح للريف رحلــه
ويشوف خلِيَّه ويفتحهــــــــا
وياخدلـُه كام لسعة نحلـــــه
ــــــــــــــــــــ
يرجع يقول : يخرب بيتـك
خلـِّتني اصدَّق وصفاتـــــك
والله لاكتِب فيك شكـــــوى
دوَّر بقىَ ع اللي يغِيتـــــــك
ــــــــــــــــــ
***
3_ ردى على الأستاذ / مسعد النحلة
وانا هارد عليك واقولك
***
ياعم مسعد كلى فداك
لو هارمى نفسى م الشباك
تسلم ايدين وصفتلى دواك
وان رحت فين أنا برضو معاك
**
ياعم مسعد ياحبيبى
الطب دايماً تجريبى
بس اوعى تقصد تخريبى
حاسب عليا انا باترجاك
***
خالص محبتى واحترامى وتقديرى
أخوكم / الطبيب الشاعر
**
كتبت هذه القصيدة على معنى القصيدة
وتواصلاً معها ..
**
آآه ياقلبى من عذابَك
هُوَّ إيه بس اللى جابَك؟!
للغرام والسَهم صابَك؟!
مااحنا كُنـَّا كويسين !!
***
آآه ياقلبى ليه تعانى ؟!
من عذاب الحُب تانِى ؟
كُنت مظلوم واللا جانِى !!
ليه بترجع بالسنين ؟!
***
آآه ياقلبى لو تِخالِص
م الغرام والحُب خالِص
هُوَّ إيه بس اللى ناقِص ؟!
نِبقـَى يعنى قرَيبين ؟!
***
آآه ياقلبى من هواها
واللى حَسِّيتـُه ف لـُقاها
لو تعيش عُمرَك معاها
تِبقـَى ضِحكِتلِى السنين
***
وهذا رد الشاعرة الواعدة
حنان التهامى
على القصيدة
**
ااه يا طبيب م اللي صابني..!!
باينه كلامك فجأه خدني..!!
عند حبايبي بسرعه جابني
وخلاني أحس بحنين..
ااه يا طبيب م اللي فات..!!
كانت مٌــــــــر الذكريات..
قالوها عني فِ حكايات..
وكانت اصعب سنين..
ااه يا طبيب من شعرك انت..!!؟
حلاوته تملي تزيدك حته..
وفي اي نوع تلاقيلك سكه..
وبشعرك نبقي مبسوطين..
الــلــــــــــــــــــــــــــــــــــــه عليك يا طبيبنــــــــــــــــــــــــــــــــا
سلامي خير ختامي
***
ردى على الشاعرة
حنان تهامى
***
آآه ياحنان ياتهامى منك
دُقرُمَه مع صغر سنك
ربنا يبارك فى فنك
والدراسة تكون نجاح
***
آآه ياحنان ياتهامى سيبك
م العذاب اللى ف قـُليبـِك
بكرة هيكون من نصيبك
فرح غالِب ع الجراح
***
آآه ياحنان ياتهامى تانى
عيشى فى النور والأمانى
واكتبى شعر وأغانى
منتدى (الرحمن) براح
***
خالص احترامى وتقديرى
أخوكم / الطبيب الشاعر
***
منتدى الرحمن هو
منتديات الشاعر الكبير الثائر
عبد الرحمن يوسف
وهو كشاعر من أجمل من قرأت لهم
فى الوقت الحالى
والمنتديات
من أحب وأقرب المنتديات إلى نفسى وقلبى
***
رد آخر من الشاعرة
حنان تهامى
**
أأه يا طبيب من كلامك..!!
وصلني منه خير سلامك..
وحسيت ف قرايته بغرامك..
ماهو شجن مليان أنين..
***
وأأه منك يا طبيب..!!
تسال زي القريب..!!
بقلب اصفي م الحليب..
وتقع فيه وقعه كمين..
***
وأأه من قلب طبيب و شاعِر..!!
عنده اسمي م المشاعِر..!!
حب صعب جميل و واعِر..!!
وتلاقيه مليان حنين..
تقبل مروري الزائد
رخامه بقي
سلامي خير ختامي
***
وهذا ردى عليها
***
ياحنان زاكرى النهارده
واطلعى الأولى كمان
ياللا سيبك م اللى عَدَّا
واللى فاتك من زمان
وارفعى راية المودة
والمحبة والحنان
واسمعى كلمة مجرب
شغلته دكتور كمان
الشهادة أهم حاجه
هى حِصنِك م الزمان
***
أتمنى لك دوام التوفيق والتفوق
أخوكم / الطبيب الشاعر
**
آآه ياقلبى من عذاب الشوق وحُبَّك
آآه ياقلبى م اللى ساكن جوَّا قلبَك
آآه ياقلبى م اللى فاكرُه تـَمَلـِّى جنبك
آآه ياقلبى ياللى سهران الليالى
آآه ياقلبى مش بالومك ؛ لأ باعاتبك
******
