كل الأصناف هَـتخـُش تابوت ...!

 

كل الأصناف هَـتخـُش تابوت ...!
***
من تأليف
**
الطبيب الشاعر / د. محمد رزق
*
*

فى جراب الحاوى التعلب فات

والتوتة بترمى بَلـَح أمهات

والكـُل متـَبِّـت ، عايش ، مات

وصراع بين راجل والسِّـتات

والغـُربة بـتِحلـَى لكل الناس

عـُقدِتنا ف تقليد الخواجات ...!

***

فى جراب الغاوى ينام مستور

وبيحلـَم بالصورة ف بَـسبور

يركب طيارة ، يعَـدِّى بحور

ويقول للفقر ف يوم ، ماتغور

ويعَـبِّـى جيوبه دَهب أو ماس

لـَكِن ماتشوفش عيونه النور ...!

***

فى جراب العالِـم ألف كتاب

بـِيدَوَّر فيها عن الأسباب

ويفـَتـِّش حَـتـَّى ف كل سحاب

ويلاقى طريقـُه ضـَباب وسَـراب

بـِيمَـوِّت فيه مَـعنـَى الإحساس

يـِمكِـن يرتاح لو كان كـَدَّاب ...!

***

فى جراب الشاعر لـَحن جميل

مَـفروش على ضـَفـِّة نهر النيل

ضِـحكايـَة تـفـَـرَّح قـَلب عَـليل

شـَمعايـَة تـنـَوَّر وسط الليل

نِـجمايـِة حـُب ، قـَمَـر وَنـَّاس

وبيصبـُر مهما يدوق الويـل ...!

***

فى جراب الفاجر مـَكر غـَريب

وعيونـُه تشوفها تخاف م الديب

ويـخـَبـِّى النور جوَّا السراديب

ويخون ويـبـيع ويخوض ويعيب

تـِركيبـَة وفيها الشـَّر أساس

والكل يشوفـُه يقول لـَعـِّيـب ...!

***

والناس بتعيش ف صراع وتموت

تقضى الأيام والعمر يفوت

ظالم ، مظلوم ، مفترى ، هَلفوت

كل الأصناف هتخش تابوت

والرب هيحكم بين الناس

هوَّ الرحمن ، صاحب جبروت ...!

***

خالص تحياتى
وكل عام أنتم جميعاً بخير وسعادة
* 
الطبيب الشاعر / د. محمد رزق