( الرسالة الخامسة )
*
شباب مَقهـور وبـِيعانى ..!
***
من كلمات
**
الطبيب الشاعر / د. محمد رزق
*
*
*
أنا شـُفتـُه وانا مَـقهور ،
بـِيـِضرَب إبنـِّى بالجَّـزمَة
وفى فـَقـرَة مِنِ الدستور :
بـِمَـنعِ العُـنف فى الأزمة
كلام مَكتوب صحيح لـَكِن
مَعَ الأوباش مالوش لازمة
وبـِتـطـَبَّـق قانون الغاب ،
بـِنود الغـَدر بالأحباب ،
تِعافِـر تِـنقِـطِع راسَـك ،
تِطاطيلِى حَ نِـبقـَى اصحاب ،
ومن حَقـَّك صَحيح تاكـُل ،
ولو مالقِـيتـش ؛ سِــف تراب ،
ومِن حَقـَّك كمان تِـلبـِس ،
وتِـحلـَم والأمَـل كـَدَّاب ،
ومِن حَقـَّك تكون عالـِم ،
ونِـرفـَع سِـعر كـُل كتاب ،
ومِن حَـقـَّك تجادِلنى ،
وبَـس بخوف .!، بألف حساب ..!،
ومِن حَقـَّك تكون دكتور ،
وتِـغرِز فى المَـريض أنياب ،
ومِن حَقـَّك تكون وَطـَنى ،
ومِن حَـقـِّى أكون نـَهَّـاب ،
ومِن حَقـَّك تِكـَلـِّمنِـى ،
ومِن حَقـِّى أسِـدِّ الباب ،
ومِـن حَقـِّى أسوق فـيكـُم ،
واقول عَـنكـُم هَـمَج وِكلاب ،
شـَباب مَـقهور وبـِيعانِـى
ويصـرُخ فين حقوقى ياناس ،
ولاة الأمر مانعانى
أعَـبَّـر عَن مَـرار الكاس ،
ولا انطـَق كِلمَـة بـِلسانِى ،
ولا اكتِـب كِلمَـة فى الكـُرَّاس ،
وصوت الشـَّر بـِيلـَعلـَع
وصوت الخير هِنا بيـِنداس ،
وأرضى الحُـرَّة صَـبَـحِت بور
ومِش قادِر أشيل الفاس ،
حُـماة الشـَّعب جايـبـينهُـم ،
يكونوا لِـلظـَلام حُـرَّاس ،
ولـَكِن رَبـِّنا القادِر ،
يخـَلـِّى الجيش أمَل لِـلناس ،
ونِـقـدَر نِـعبُـر الأزمَـة ،
ونِـقـدَر نِـغلِـب الخـَنـَّاس ...
***
مع خالص محبتى لأبناء مصر المخلصين لأرضها ..
وأبناء العرب المساندين بكل الحب لأصحاب الحقوق .
*
الطبيب الشاعر / د. محمد رزق
*
القاهرة فى 28-1-2011
*
ليست هناك تعليقات:
إرسال تعليق