الرسالة رقم 15
*
بَلاش فى الزَّحمَة نِـتسابـِق ...!
***
من كلمات
**
الطبيب الشاعر / د. محمد رزق
*
*
*
بـِتِـبنى الثورَة كام طوبَة ؛... وكام طوبَة يـِهـِدُّوها
ويـبنوا فوق جـِبال الخوف ؛... خـُطـَى مشاوير يرُدُّوها
وتِعزِف آه جـِراح النـَّاى ؛... وفى المواويل يغـَنـُّوها
وتِرقـُص دَمعِـتى عَ العود ؛... ولـِمَّا تعود يخـَلـُّوها
تِـبان معقودة فِ جبـينى ؛... مُحِبـّيِنى يصُـبُّوها
وتِفضـَل جَرح فوق الليل ؛... وجَنب النيل يحُطـُّوها
يقوم يرفـُسها ألف شراع ؛... ومَركِب ضاع بـِيـِنسوها
وتِعلا الموجَة فوق شـَطـِّى ؛... ومِن بَختى يرُصُّوها
على أمواج بـِتِـتراكِم ؛... وكام حاكِم يحاكموها
وحُكم اليأس مِش عازِر ؛... سنين فى الذُّل عِشتوها
وصبرى لبُكرَة مِش قادِر ؛... وميت فاجـِر يزُقـُّوها
ومُخلِص قال كلام مَعقول ؛... وألف رسول بـِيـِتلوها
ويـِخلـِف كِلمـِتـُه ويعود ؛... يقول مَعلِشِّ عَدُّوها
نِعَدِّيها عشان خايفـين ؛... من اللايمين يـِضـُرُّوها
ونِرجَع تانى نِـتخـَلـِّف ؛... ونِرجَع تانى لِـ التـُّوهَـة
وقـَلب الأم نـِفـسُـه يعيش ؛... ياريت بـِالحُب تِـحيوها
بلاش نِطمَع ونِـتخانِق ؛... بلاش بالشـَرِّ تِـبلوها
بلاش نِقتِل فِ بَـعضيـنا ؛... بلاش الهَـدم وابنـوها
بلاش فى الزَّحمَة نِـتسابـِق ؛... بلاش بـِسهامكوا تِرموها
وقـُدَّامنا البلاوى كتير ؛... بلاش فى العَـد تِـنسوها
وتِـنسوا الأصل والعِنوان ؛... وإيد الخير تِـعَـضـُّوها
إذا اتمَـدِّت أمَل وَنـَّاس ؛... ياريتكوا ياناس تساعدوها
عشان بُـكرَة يعود بـِالنـُّور ؛... ومَوكِب حور يزِّفوها
ولـَو مَرَّة تقول الآآه ؛... بكل الغالى يـِفدوها
وتِـرجَع تانى ضِحكِتـها ؛... بـِصوت ملايين يـِقـَوُّوها
وتِـزرَع فى الوجود أنوار ؛... بـِإيد ثِـوَّار؛ و يـِهدوها
بـِكـُلِّ الحُب لـِلأحرار ؛... دروس فى الثورَة يقروها
***
**
*
أراد الله سبحانه وتعالى لثورتنا المباركة أن تنجح ،
وأن تقضى على رؤوس الفساد فى مصرنا الحبيبة ،
ولكن الطريق مازال طويلاً أمامنا لتكتمل منظومة التطهر
من أذناب الفساد المتغلغلة فى جميع مصالحنا الحكومية والخاصة ،
لذا أرجو أن نظل متمسكين بالحلم العام ، وأن نرجئ الأحلام الخاصة
وأن نثق بالجيش وجميع أبطاله الذين ساندونا وساهموا فى نجاح الثورة ، وأن نساعد فى بناء ماتهدم ،
لنحصل بإذن الله على غدٍ أفضل ، ويتحقق الحلم .
والله المستعان وهو سبحانه نِعم المولى ونِعم النصير .
*
الطبيب الشاعر / د. محمد رزق
*
ليست هناك تعليقات:
إرسال تعليق