طـَبـعاَ مِـش فاهم ...!
***
من كلمات
**
الطبيب الشاعر/ د.محمد رزق
*
*
حِـلمَك مرسوم فوق تنهيدَة .. تحت القـُضبان ..!
خايف ؟. مظلوم ؟.، دنيا جديدة .. بس بـتِـنجان ..!
ماتقوم تكتبلك تغـريدَة .. والكون نعسان ...!
*
وتبـَطـَّـل تِـحـسِــب مِـشـــوارَك أيام وســـنين ..!
وتعـيش مِـتـغـَرَّب عن دارَك وسط التايهـين ..!
لأ حاول تِـكـتِـب أشعارَك والناس فاهـمين ...!
*
هات المزمار واعزف تانى لحن العشاق ..!
وارسم مشوارك بأغانى واوصف أشواق ..!
واعقل واتجنن فى ثوانى وانسى الأخلاق ...!
*
فى الشارع ماشى ومش دارى ؛ يجرالك إيه ..؟!
يجرالك زى اللى جـَرالى .. حَ تفكر ليه ..؟!
عايش أو ميت ..؟ مش فارق .. بس نعديه ...!
*
يومك حَيفوت زى السابق لـو كان مكــتوب..!
بـَطـَّـل تتشائم واتفائِـل واشــــرب مشــروب ..!
نِعـناع بالكُـفتة وبالكارى وسُـكر بيدوب ...!
*
حَـزِّم أفكارَك ، مش لازم تِـربُـط بحـــزام ..!
واكتم إحساسك .. أنفاسك ؛ واتغـَطـَّى ونــام ..!
وامـنع أحلامك ، أيامَـك مش دى الأيــــــام ...!
*
فـَـاهِـم ؟!.. تتألم وتعانى وازاى حَـتعيش ..؟!
فين المظلوم ..؟ فين الجانى ..؟ فين الدرويش ..؟!
طبعاً مش فاهم ؛ لو فاهم ... ماتكلـمـنيش ...!
*
القاهرة فى يوم الجمعة
2 أغسطس 2013
الرابع والعشرين من رمضان 1434هـ
*
الطبيب الشاعر المصرى/ د.محمد رزق
*
ليست هناك تعليقات:
إرسال تعليق