أولادى مش لاقية بيت ...

أولادى مِــش لاقـيـَــــــــه بـيـت...!
***** 
من كلمات 
***
الطبيب الشاعر / د. محمد رزق
 *** 
واقِـف هـِـنا بعـدِنا 
قـول ييجى ألف نـَفس 
جُـوَّا الطابور كُلـِّنا 
نازلين فى بَعـض رَفـس 
والأرض من تحـتِـنا 
مخفوسَه وزايدَه خـَفس 
وهناك بعيد عـَنـِّنا 
ناس هايصَة ونازلـَه رَقص 
*** 
باتمنـَّى م المهرجان 
إنـِّى أطول شـَــــــقـَّه 
لو بَـس أربع حيطان 
ومش هاقول لأه 
تِقـفِـل عَـلـَيَّا البيبان 
تحمينى م السِرقه 
ماهو إيه مُراد الجَعان ؟!! 
لـُقـمَه وحِفان دُقـَّـه 
*** 
وصَّانى أهلى أعيش 
مُخلِص وحـَقـَّانى 
واطلـُب حقوقى وماليش 
فى الدُنيا شئ تانى 
مااسكُتش ع التهبيش 
والحَـقِّ عِـنوانى 
باصرُخ ومايهمنيش 
من ظـُلم ولا جانـِـــــى 
*** 
وسنين باحارب واشوف 
إللى سَرَق واغـتـَنـَىَ 
ما دول عددهم ألوف 
واكتـَر كتير بَـس انا 
نِـفـسى العزيزه تعـوف 
إنـِّى أطول دا الهنا 
قالوا ياخويا دا خوف ! 
دا خوفى من رَبِّـنا 
*** 
والشمس غابت علينا 
جوَّا الطابور ياكِرام 
هانت خلاص وبإيدينا 
هنحقق الأحلام 
والسَعد يوصَـل إلينا 
ونصالِح الأيَّـام 
وتقول قلوبنا الحزينة 
نـُلنا خلاص المَرام 
*** 
أخرة دا كُله لـَقيت 
قـَبلى كتير حاجزين 
قالـِّى الموظف ياريت !! 
هنجيب أماكن منين ؟! 
وسمعت منه وبكيت 
ورجعـت تايه حَـزين 
أولادى مش لاقيَـه بيت 
تِـدَّارى فيه م السنين 
*** 
من ديوان 
( قلوب الناس بتتكبر ) 
*** 
خالص محبتى وتقديرى لزوار المدونة
 الطبيب الشاعر / د. محمد رزق