( الرسالة الأولى )
*
ضاعِت فلوسى كـُلـَّها وضاعوا العيال ...!
***
من كلمات
**
الطبيب الشاعر / د. محمد رزق
*
*
*
شـُفتـُه بـِيـِبكِى وف إيديه ،
ماسِك عِيالـُه المَحرومين
مِن كـُل مَعنـَى للحياة ،
للحُب ، للعيشـَة الحلال
بَـكـِّتـنى كِلمَة م العِـيال ،
بـِتقول ياناس عايزين نعيش ،
عايزين نِـبات يوم مرتاحين ،
عايزين علاج للجرح دا احنا مجروحين ،
عايزين غطا م البرد والله بردانين ،
عايزين نِحِـس ان الوَطن حُضن ودَفا ،
عايزين فلوس تكفينا يوم ،
عايزين كِتاب ، عايزين هدوم ،
تِكسينا واحنا عِريانين ،
وسمعت واحد من بعيد ، بيقول حرام ،
سيب العيال فى البيت وعود ،
قام بَـصِّـلـُه وعيونه مالياها الدموع ،
وحلِـفـلـُه إنـُّه ماعندُه بيت ،
يقفِل بيبانـُه عَ العيال ،
كل الحكاية أوضة مَبـنـَيـَّة بصَفيح ،
إكمِـنـُّه مَصرى لِـلنـُخاع ،
رافِض يبيع زى اللى باع
والإسم واحد م الرعاع ،
قـَصدى الرَّعِـيـَّة المنكوبين ،
رغم انـُّه مِش لاقى الغموس ،
لـَكِن بـِيـِدفـَع للدروس ،
ويوَطـِّى عَ الـرِّجلين يبوس ،
لـَجل العيال تِـلقـَى العلام
تِـلقـَى الدَّوا يشفِى المريض
م الرَّبو ، من كـُتر السُّـخام ،
وبرَغم ذُلـُّه لِلجَميع ،
يلقـَى الجميع بيقول بـِكام ؟!
قام بَـصِّـلـُه التانى وقال :
سامحنى مِش قاصِد ألوم ،
ماالكـُل غـَرقان فى الهموم
خايف تِطول المَهزَلـَة ،
يـِتـبَـهدِلوا فيها العيال .
قال لــُّه العيال مِـتبَهدِلين ،
من يوم ماباعوا شِركِتى
وادُّونى قِرشين م الفـُتات ،
واتقـالـِّى رَوَّح مِن سُـكات ،
رَوَّحت يومها بـدَمعِتى ،
وادِّيت فِلوسى كـُلـَّها لـ ام العِيال
قـُلت اصرفى ع الأد يمكِن رَبـِّنا
يكرمنى والقـَى شـُغلـَة تانية تلِمـِّنى ،
داريت دموعى عَـنـَّها ،
ولقِـيتها قايمَـة تضـُمِّـنى
قالِـتلى خـُد شئ م الفلوس ،
روح اشتِرى حَبـِّة خـُضار
وافرش هِنا قـُدَّام عنينا ،
وياللا بـِيع ،
دا القِرش لـَو يقعـُد يضيع ،
قـُلت امـَّا اشوف ..!
وسهِرت افـَكـَّر فى الكلام ،
قـُصرُه لـَقيت الفجر قام ،
وجريت قـَوام ،
صَـلـِّيت ياخويا الفجر حاضِر
ورجـِعت بيتى وقـُلت انام ؛
ولقيتها جَهـِّزت الفِطار ،
وَيَّـا الفلوس لـَجل الخـُضار
خـَدت الفِلوس ومشيت وقـُلت مابـِدِهاش ،
خير البَـلــَدِّى لِسـَّه باقى ومانتـَهاش ،
جَـرَّب وحاول ، هُـوَّا مين بالحُـزن عاش ؟!
قـُصر الكلام ،
جـِبت اللى فيه القِسمَة ورجـِعت الديار
صَحصَح معايا يابن عَمِّـى فى اللى دار ...؛
يادوب فـَرشت الفـَرشـَة ولقيت مـُخبرين ،
لـَمُّـوا البُـضاعَة كـُلـَّها ؛
إشغال طـَريق ..!
دا انا جَنب بيتى ! ،
هُـوَّا فين بَس الطريق ؟
صارت قـَضِـيَّـة والمحاكِم زُرتـَها ،
عُـمرى ف حياتى يابن عَمِّـى مارُحتـَها ،
قالوا بكـَفالـَة والكـَفالـَة دَفـَعتـَها ...!
لـَجل يسيبونى بَس أخرُج مِنـَّها ،
والحُكم صادِر حَجز عَ البيت والعِزال
ضاعِت فلوسى كـُلـَّها وضاعوا العيال ،
ضاعت حياتى كـُلـَّها وضاعوا العيال .....
*****
هذا الموضوع أحد الترجمات لأسباب التظاهر لبعض المتظاهرين فى مصر
وسوف أعود بإذن الله لتقديم باقى النماذج والله المستعان ..
حبى واحترامى لجميع أبناء العرب المخلصين للعروبة ،
والمجاهدين للخلاص من الظلم والإستبداد .
*
الطبيب الشاعر / د. محمد رزق
*
القاهرة فى :- 25 / 1 / 2011
ليست هناك تعليقات:
إرسال تعليق