( الرسالة الثالثة )
*
وصحينا عَ الفجر الوَليد ...!
***
من كلمات
**
الطبيب الشاعر / د. محمد رزق
*
*
*
يـاااااااه ياوطن ؛ باعوك لمين ؟!
وتساوى كام وسط الزحام ؟!
رَغم التاريخ الحُـر وألوف السنين ،
اللى انتَ فيها فوق جبين الكون وسام ،
والشعب عايش والسلام ،
والكل فاكِر إنـُّه نام ،
وف لـَحظـَة قام .....!
نـَفـَّض تـُراب الخوف وثار ،
ماهو أصلـُه عايش فى انتِظار ،
شـَمَّـر دِراع القـَهر بانوا العَـضمتين ،
والدم ناشِف م العَـطـَش طول السنين ،
وَحِّد كلامُـه الغـُلب والدَّمع الحزين ،
لازم نثور ع الذُّل ، لازم نـَستـَفيد ،
لازم شموع العَدل فى العالـَم تقـيد ،
لازم يعود الحب تانى من جديد ،
وصحِـينا عَ الفجر الوَليد ،
نِسأل جموع الشعب ، نِعرَف مَطلـَبُه ،
واحد يقول : إبنى الكبير
عِشرين سنة خِرِّيج ياناس ،
مالقاش وظيفـَة عَ المَقاس ،
واكمِـنـُّه طـَيـِّب وابن ناس ،
رافِـض يكون دَلدول ويكتِب مِن سُكات ،
رافِض قانون الغاب ( باصيلى وخـُد وهات )
رافِض يـزَوَّر فى حسابات ،
راجـِع وراهُـم قام كـَشـَف ،
( مليون ) فى واحِد م الخانات ،
واشحال بَـأه باقى الخانات ،
وبسرعة قامت معركة ،
بيـنـُه وبين المَسؤلين المَسنودين ،
بِس انـتـَصَر فيها الروتين ،
تـُهمَة ولِـبسِـت ذِمِّـتـُه ،
قالوا ياإمَّـا السَّـجن إمَّـا تـَستـَقيل ،
قام استـَقال والدَّمع غـَرَّق سِـكـِّتـُه ،
مِن يومها صار الحُزن ساكِن دُنيـِتـُه ،
رافِض يعيش ، رافِض ينـَشـِّف دَمعِـتـُه ،
بس النهاردَه لـَمَّـا ثار الشـَّعب جَـدِّد هِمِّـتـُه ،
حالـِف مايـِرجَع فى القـَرار ،
إلاَّ إذا عاد العَـمار ،
وانزاح عَن الناس الجـِدار ،
م ِالخوف وقـَسوِة لِـنتِـظار ،
والعدل ساد بين الجميع ،
يـِبقـَى الصُّـغار زَىِّ الكـُبار ،
صَحِّـت قلوب الناس مآسِى ف قِصـِّتـُه ،
وامَّـا وقِـع وسط الزحام ،
إيد الحبايب ساعدِتـُه ،
وبرَغم كـُل الحُـزن قام ،
عَ الوش راسِم بَـسمِـتـُه ،
بـِالبَـسـمَة قال أجمَـل كلام ...
***
**
*
هذا الموضوع أحد الترجمات لأسباب التظاهر لبعض المتظاهرين فى مصر
وسوف أعود بإذن الله لتقديم باقى النماذج والله المستعان ..
*
حبى واحترامى لجميع أبناء العرب المخلصين للعروبة ،
والمجاهدين للخلاص من الظلم والإستبداد .
*
الطبيب الشاعر / د. محمد رزق
*
القاهرة فى :- 26 / 1 / 2011
*
ليست هناك تعليقات:
إرسال تعليق