قـَـرَّب وجَــرَّب حُــبـِّنا ...!
***
من كلمات
**
الطبيب الشاعر / د. محمد رزق
*
*
*
هوَّا انتَ ليه خايف تكون من صُحبتى ..؟
والحب إيه غير الجنون فِ محَـبـِّـتى ..؟
قرَّب تعالـَى وحِـب ؛ صَـدَّق كِلمتى ...
شوف النعيم اللى احنا فيه ...!
قلبك بيعند بس ليه ..؟
وان كنت خايف مننا ..؛ قرَّب وجرَّب حبنا ..؛
قلبك حَ يـِبقـَى ف وِسطنا وحَ نخاف عليه ...
*
ليه تـِبتـِدِى سكة لـُقانا بالظنون ..؟
هىَّ المشاعر تِـحـلـَـى من غير الجنون ..؟
إفـرد جناحك وامشى ويانا الطريق ..؛
واسعد صباحك باللقا ويَّـا الصديق ..؛
وافرح معاه واتهنى بيه ...
قلبك بيعند بس ليه ..؟
لـَو كنت خايف مننا ..؛
قرَّب وجرَّب حبنا ..؛
قلبك حَ يـِبقـَى ف وِسطنا وحَ نخاف عليه ...
*
طب مااحنا زيَّـك مجروحين ، والحب لـوَّع قلبنا ..؛
ياما اشتكينا م الحنين ، ياما بكينا لوحدنا ..؛
وطلعنا منه كسبانين ، نِـعـرَف نِـطـَيـِّب جرحنا ..؛
نكتب روشتة بالدوا ،
ونعلم الناس الهوا ،
وازاى تعيش مرتاحة فيه ...
قلبك بيعند بس ليه ..؟
لـَو كنت خايف مننا ..؛
قرَّب وجرَّب حبنا ..؛
قلبك حَ يـِبقـَى ف وِسطنا وحَ نخاف عليه ...
*
القاهرة فى يوم الأحد
8 إبريل 2012
*
بالحب نرَى الوجودَ جميلا
فمرحبـًا بالحب والأحباب ...
*
*
الطبيب الشاعر / د. محمد رزق
*
ليست هناك تعليقات:
إرسال تعليق