وكـُنـتـُم كــدَّابـيــــن**
*****
وسط عتمة ليل وكان.. الفجر بان!
شق عمر الخوف، وخبط ع البيبان
نـَـوَّر القنديل ونادَى، افتحوا يااهل المكان
إصحوا لاالدنيا تاخدكم..
وسط توِهة ليل يطول فيه الزمان
======
أصل كان الناس ليلتها نعسانين
فاتوا حُضن الأم فاضى، والأسى يشكوه لمين؟
هِىَّ صرخة فى الوجود وسط اللى ناموا
خَلـِّت ا لأيام تعود والكل قاموا
أيوه قاموا،! بس قاموا مذعورين،!
يسألوا سِكتنا فين؟
يفردوا الأوهام على وش الحقيقه
حتى فى الأحلام بيبقوا كدابين!!
=======
طارغـُراب اليأس عشش فى السنين
هَد معنى البأس فى قلوب الإيدين
قاموا شالوا من تراب الحزن حطـُّوا ع الرؤوس
والنفوس الطاهرة قتلتها النفوس...!!
اللى فارده الغيم على عمر الزمان
والأمل زاعق وراهم ، إسمعوا ياهل المكان
دا الأسى دق الطبول ، والمطر نازل سيول
دوقوا طعم الميه فى السيل اللى نازل ع الحيطان
تلتقوه مش ميه لاكِن..!!
مـُر من ذل وهوان
======
إكدبوا...
قولوا كلمة لأ فى وش الحقيقه
هـِدوا أحلامكو بإيديكم
إهربوا...
من ميدان الحق بنفوسكو الغريقه
بين معانى الكدب فيكم
بس ماتقولوش فى يوم ، للزمان كلمة ندم
لما تصحوا بعد نوم ، تلتقوا الصرح اتهدم
مانتو هَدِّمتوه بإيدكم ، لما كنتم نعسانين
لسه حـُضن الأم بينكم ، مين يعود للحـُضن مين ؟
مانتو لازم ترجعوا...
بعد طول التوهه برضو هترجعوا
تسمعوا لحن الحقيقه ؛
غصب عنكو هتسمعوا
بس لما ترجعوا ..،،!!
ماتقولوش خان الزمان
قولوا كلمة حق ترضاها السنين
إنكم تهتم عشان .،،
عشتوا فى الأحلام ، وكنتم كــدابين
مع تحيات
الطبيب الشاعر
elshaer_eltabib@yahoo.com
elshaer_eltabib@hotmail.com
هناك تعليق واحد:
واصل تالقك ايها المتميز دوما
تقبل مروري وتعليقي اخوك عبد الرحيم
معالج بالقران
fkihdaoudi-abdo@hotmail.com
إرسال تعليق